Според Донатино Маркон, амбасадорот на Република Италија во Македонија музејот има посебно значење бидејќи со тоа само се потврдува дека Италија, која е број еден земја во светот по производство на вина, ги цени македонските сортни вина

Македонија вчера го доби првиот Музеј на виното, кој беше отворен во Неготино. Ова е прва институција од ваков вид во земјава од која се очекува да биде катализатор на развојот на винарството и лозарството, алтернативниот туризам во неготинскиот регион, но и пошироко. Музејот треба да биде вистински промотор на македонското бренд вино во светски рамки. Проектот го подготви Фондацијата "Тиквешки вински пат", а е реализиран со финансиска поддршка од Италијанската влада. Инвестицијата е вредна 90.300 евра, од коишто 60.300 евра се донација на италијанската влада, а останатите 30.000 евра се обезбедени со кофинансирање од општински средства и дел од Фондацијата "Тиквешки вински пат".

За Донатино Маркон, италијанскиот амбасадор во Македонија, музејот има посебно значење бидејќи со тоа само се потврдува дека Италија која е број еден земја во светот по производство на вина ги цени македонските сортни вина.

- Сметаме дека отворањето на една ваква културна институција во Неготино ќе придонесе не само кон развојот на винската култура, целокупното културно живеење, туку и за развој на туризмот во регионов - вели Ѓорѓи Кимов, градоначалник на Неготино.
Тој е задоволен што токму во неговиот град е отворен првиот вински музеј, бидејќи се отвори вратата кон Европа и светот.

Во музејот се изложени и стари артефакти,односно разни древни садови кои се употребувале за вино, што само потврдува дека во земјава виното се точело од секогаш и дека имаме долга традиција. Во музејот се најдоа и вината на познатите винарии: Чекорови, Пивка, Повардарие, Дудин, Бувин, но како што кажа градоначалникот Кимов, Музејот е отворен за соработка и за останатите вински визби во реонот.

Инаку,Фондацијата Тиквешки вински пат со реализацијата на овој успешен проект само потврдува дека локалниот економски развој на неготинскиот крај е токму преку алтернативниот туризам, винарството и земјоделството.