Драгоцени археолошки предмети кои потекнуваат од периодот меѓу 3. век пр.н.е. до 3 век од н.е., се пронајдени во домовите на двајца браќа во селото Марвинци. Предметите од македонско-хеленистичкиот период се откриени по претходно добиени сознанија на МВР, и имаат голема културна вредност.

Се работи за: 11 монети, монистра, копче со претставен лав на него, 20 фрагменти од теракотна фигура, фрагменти од олово, од мегарска чаша, железен врв од копје - македонско-хеленистички период, 6 салтаментни фрагменти од бронза и сребро...
- Овие лица ги ископувале предметите долго време наназад. Со помош на детектори ги наоѓале, ги отворале гробовите, и ги присвојувале предметите од археолошкиот локалитет Исар Марвинци, рече на вчерашната прес-конференција, министерката за внатрешни работи Гордана Јанкуловска.

Таа објасни дека двајцата браќа, откако започнале ископувањата на локалитетот Исар Марвинци, настојувале да најдат купувач.
- Една монета изнесува од 1.000 до 6.000 денари. Потоа, на интернет аукциите може да достигне и до 5000 евра, рече Јанкуловска.

На истите осомничени, од 2001 година до сега, им се поднесени 4 кривични пријави од оваа област. Еден од нив веќе бил осуден за вакво дело.
Министерката за култура, пак, Канческа-Милевска го потенцираше фрагментот од килибар, кој потекнува од 7 до 6 век пр.н.е., железно копје, две плитки чинии, амфора... Таа рече дека истражувања се вршат на 16 археолошки локалитети во Македонија, и дека на сите има чуварска служба.

Пронајдените предмети ќе бидат предадени на вештачење, а потоа ќе бидат поднесени и кривични пријави до сторителите.

Артефакти се продаваат како македонски предмети од Грција!
- Јавна тајна е дека во изминативе 20-тина - 30 години само на локалитетот Исар Марвинци диво се ископани приближно 1000 гробни места, а огромен број артефакти им се продаваат на домашни прекупувачи и грчки државјани за потоа да завршуваат на аукции како македонски предмети од Грција, рече министерката Јанкуловска.

(Де.Т.)
ФОТО: Н. БАТЕВ