Во земјите на Македонската културна сфера, според досегашните сознанија неговиот култ пуштил корења само во Охридскиот крај каде што се одржал во долг хронолошки распон, подолг од кој и да било светител во Македонскиот краишта.

Македнословените го прославувале уште од времето на Климента и неговата школа, прифаќајќи го неговиот култ втемелен многу порано, уште во предсловенскиот Охрид, Лихнидос. Со името на Св. Еразмо е сврзано верувањето дека тој бил првиот проповедник на христијанството во овој град каде што со илјадници ги покрстувал на “Белото Езеро”.

Охрид бил најзначајното извориште на неговиот култ во средниот и доцниот среден век. Во средновековниот Охрид на Св. Еразмо му е посветена една пештерна црква, близу до брегот на Езерото, би рекле во самата “утроба” на издигнатиот Габавски рид на кој се откриени културни напласти и од предхристијанскиот период, каде што е сé уште загадочната тврдина со киклопски ѕидини од времето на Македонските кралеви.

На околу двесте метри југоисточно од манастирскиот комплекс, откриена е старохристијанска базилика од III - IV век, исто така посветена на Св. Еразмо.

Живописот во пештерната црква е сочуван во три сликарски фази, а во најстарата од нив идентификуван е ликот на Св. Еразмо, кој потекнува од XIII век.

Најголемо внимание во оваа пештерна црква заслужуваат портретите на Св. Еразмо и ликот на византискиот император Андроник II Палеолог.

Осаменоста на оваа пештерна црква на овој дел од брегот на Охридското Езеро, имено - стеснетоста на користениот простор и некои други елементи, укажуваат дека се работи за поединечни испосници, или пак сосема мало калуѓерско братство коешто живеело во малите конаци покрај пештерата.