Македонската култура наскоро ќе биде претставена во Прага, по повод претседателствувањето на Чешка со Европската унија. Манифестацијата "Денови на македонската култура", според надлежните во Министерство за култура, во Прага ќе се случи во првата половина од годината, а ваков тип претставувања ќе има и во Стокхолм, Шведска, но и во Киев, Украина, каде што ќе биде отворен културно-информативен центар.
- Македонската култура во Прага ќе биде претставена преку изведбата на камерниот оркестар на Македонската филхармонија, под диригентската палка на маестро Борјан Цанев. Ќе настапи и музичката група "Фолтин", чиј настап ќе биде проследен со ликовниот перформанс на Мирослав Масин. Во Прага ќе се чујат и авангардните музички звуци од Македонија преку изведбата на Кирил Џајковски, Дуке Бојаџиев и Анџела Мек Класки. Настап и презентирање на македонската изворна музика ќе има и преку изведбата на Стевче Стојковски со својата група, велат во Министерството за култура.

Предвидено е чешката публика да се запознае и со репрезентативни дела од македонската кинематографија. Ќе има изведба на театарската претстава "Лебедова песна" во режија на Бранко Ставрев, а ќе бидат промовирани и три тома на изданијата на Државниот архив "Чехословачки дипломатски документи за Македонија", а ќе биде претставен и дел од богатото археолошко наследство на Република Македонија.

Помали претставувања на македонската култура ќе има уште и во неколку други земји со кои годинава нашата држава одбележува 15 години билатерална соработка.

Република Македонија ќе биде во центарот на светските културни случувања и во септември кога над 1000 уметници и гости од 48 земји, ќе бидат дел од светски значајната манифестација 14. Биенале на млади уметници од Европа и од Медитеранот".
- Голема меѓународна промоција е планирана и во Венеција, каде што во април ќе има претставување на зборникот "Охридските пораки за мир и соживот". Во Венеција на познатото Венециско биенале за уметност што се одржува од јуни до ноември годинава ќе се претстават македонските уметници Гоце Наневски и Никола Узуновски, додаваат во Министерството.

Даниела ТРАЈКОВСКА