Во одлична ракометна претстава, пред голем аудиториум, кој на крајот си замина со полно срце, не само од победата на победата на Металург над францускиот Париз, туку и заради прикажаната игра. Победата од 9 голови разлика му дава реални шанси на нашиот претставник во КПК да се надева дека ќе го мине претставникот од земјата на светскиот и на олимпискиот првак, зашто победата од 27:18 е голема и ќе го повтори минатогодишниот успех кога стигна до четвртфиналето во КПК. Централна личност на средбата беше голманот Борко Ристовски, кој не само што постигна гол од голманската позиција, што е негов специјалитет, туку беше вистински бедем за Французите. Имаше 19 одбрани, а неговите контри беа убиствени за противникот, прецизни и завршуваа со погодок. Одбрната на Металург беше стамена и цврста, Французите никако не успеваа да ја разбијат, едноставно нивната бековска линија не доби шанса да бие, а и она што мина, заврши во рацете на Борко. Победата на Металург веројатно ќе беше поубедлива, ако нападот функционираше како одбраната. Во 21 минута беше 13:5 за нашиот тим, Французите веќе беа на колена, пред катастрофа, но уследи пад во нашата игра. Париз направи скор од 3:0, ние постигнавме уште три голови, а противникот дури 7. Сепак, во второто полувреме Металург го поправи впечатокот од овие кризни минути, повторно проработија контрите и полуконтрите, и на крајот дојде до посакуваната убедлива и висока победа. Реваншот се игра следниов викенд во Париз.

По средбата видна беше радоста кај нашите, а најдобриот на паркетот Борко Ристовски вака го прокоментира мечот:
-Не случајно пред натпреварот реков дека клуч за нашата игра и победа треба да биде одбраната. Тоа е играта на Металург, која дава резултати. Одиме на победа и во Париз, само така можеме да успееме да бидеме и конечни победници, иако и деветката од Скопје е голема. Не смееме да се опуштаме, ќе работиме на психолошки план. И благодарам на публиката, која френетично не бодреше во кризните моменти за да се вратиме во игра.

Горан Ѓоргоноски и во репрезентацијата и во Металург во отсуство на Ванчо Димовски одлично се снаоѓа на пикерската позиција.
-Имаме добар резултат од 9 голови, предноста е убава, но не треба да се залажуваме дека ќе биде лесно во Париз. Борко беше јунак на натпреварот, одбрани многу топки и покрај нашата добра одбрана, тој беше клучен играч за успехот - рече по мечот Ѓоргоноски.

Други резултати од осминафиналето во КПК: Хаукар - Нордхорн 21:34, Дунафер - Пик Сегед 33:29, Колдинг - Амицита 30:30, Босна - Каустик 33:23, Стеауа - Певаферса 27:33, Бузау - Ваљадолид 27:33

Металург - Париз 27:18 (16:12)

Сала Борис Трајковскии. Гледачи 4.000. Судии: Хашчик и Отапка од Словачка. Седмерци: Металург 1 (1), Париз 2 (2). Исклучувања Металург 6, Париз 10 мин.
Металург: Брестовац, Ристовски 1 (19 одбрани), Живковиќ, С.Стоилов 1, Лазаров 4, Миркуловски 5, Ивановиќ, Недановски 3, Ѓорѓоноски 3, М.Стоилов 1, Маљцев 3, Чантурија 1, Јовиќ 1, Шмигиќ 4.
Париз:Антонаи (4 одбрани), Накиб (15 одбрани), Клементи 3, Мусион 1, Сорхандо 3, Клер 3, Дијав 2, Нитиал, Зеленовиќ 1, Филах 2, Ниворе, Ортега 3, Дорос, Ди Силво.