ССпоред натписот кој се наоѓа над влезот од внатрешната страна, црквата е подигната во 1361г. како задужбина на кесар Гргур, брат на Вук Бранковиќ, а за време на деволскиот епископ Григорие. Црквата Света Богородица е градена во форма на впишан крст со купола која се потпира на четири столба, кои во горниот дел завршуваат со различни капители.

Ѕидана е од камен, бигор и тула, а живописноста на фасадата е постигната со примената на орнаменти во најразлични комбинации (шаховски полиња-дијагонално поставени меандри, крстови и запци), сите изведени во тула. Тристраната апсида е расчленета со слепи арки. Живописот е поприлично оштетен, особено во сводовите и куполата. Во првата зона сочувани се светители во цел раст: свети Климент Охридски, свети Наум Охридски, Исус Христос, свети Богородица и др.

Она што претставува раритет и привлекува најголемо внимание кај сите посетители е претставата на света Ана - Млекопитателница како ја дои малата Богородица. Во втората зона се сцени од циклусот на света Богородица, а во другите зони се наративно прикажани сцените за Христос. Додека фигурите во пвата зона се предадени во натприродна големина, во другите композиции зографот се држи до извесни пропорции на големините, искажува смисла за природно искажување и се ползува со жива и светла колористичка гама- особено со виолетови, портокалови и светло сини тонови.

Манастирската црква Света Богородица - Заум претставува убаво остварување во архитектурата со педантно изведена декорација, елегантни пропорции и нагласена височина. Во живописот се среќаваме со уметник што има префинет вкус за чисти и топли тонови, за една жива колористичка палета.