Во конкуренција од 42 земји-учеснички рок-дуото ќе настапи под реден број 13. Втората полуфинална вечер е на 14 мај, а големото евровизиско финале е два дена подоцна. Досега, Македонија на Евросонг ја претставуваа триото Тамара, Врчак и Адријан, Елена Ристеска, Мартин Вучиќ, Тоше Проески, на два пати Каролина Гочева, XXL и Владо Јаневски. Првата генерална проба вчера Некст тајм звучеа одлично, режисерот ја прикажа неколку пати во полн сјај целата сцена за време на нашата песна, а впечатлив е и моментот кога Стефан легнува на сцената на крајот на рефренот. Стефан вели:" Нема да мислиме на тоа дека не гледаат повеќе од 100 милиони гледачи, тоа би било опасно. Ќе се концентрираме само на песната и настапот"!
Среќно за Македонија, Некст Тајм и "Нешто што ќе остане"!

Босна фаворит во првото полуфинале
Кога станува збор за евровизиската атмосфера во Москва по завршувањето на пробите во Олимписката арена, завчера се одржа фантастичен прием за сите пејачи, делегации и новинари во евровизискиот клуб. Новина беше поставувањето црвена патека за ѕвездите на фестивалот, па така се создаде скоро Оскаровска атмосфера! Организацијата беше совршена, а воодушевувањето огромно кога се појавија на сцената блескави имиња од евровизиската историја. Своите евровизиски хитови ги отпеаја Лис Асиа (првата победничка на Евровизија), Алсу, Руслана, контроверзните Тату, Марија Шерифовиќ, Дима Билан...

Вчера се одржаа две генерални проби, а денеска е третата генерална проба и првото полуфинале. Интересно е што на интерната обложувалница за првото полуфинале се уште е фаворит Босна и Херцеговина, но Турција падна на третото место, а на второто се искачи Исланд со преубава балада. Кјара од Малта не ја крие амбицијата да победи, а вели и дека смета на гласовите на бројните фанови кои досега стопроцентно ја поддржувале во Бирмингем, 1998 година каде го освои третото место, а во Киев 2005 година беше втора.