Велешани им оддадоа почит на велешките гемиџии. Претставници на Општината, политичките партии, Сојузот на борците и граѓани на споменикот на Гемиџиите, што се наоѓа на брегот на Вардар, во центарот на Велес, положија цвеќе.

Имињата на солунските атентатори денеска не се само паметник на кој се навраќаме под налетот на патриотизмот туку тие се длабоко врежани во македонските корени. Македонија во себе го носи духот на Гемиџиите", рече новоизбраниот градоначалник на Велес, Горан Петров.
Гемиџиите, со мотото "Се арчиме за Македонија" во 1903 година во Солун, за да го свртат вниманието на светската и европската јавност за тешкиот живот на македонскиот народ под турско ропство, ги извеле познатите солунски атентати. Тие биле единствени да ги жртвуваат своите млади животи за Македонија. Нивното име ја симболизира нивната решеност - гемијата пуштена да плови по бурно море ако има среќа ќе стигне до мирен пристан, а ако не, ќе се скрши од некоја карпа. Со експлозија ги кренале во воздух Отоманската банка, Поштата, железничката линија, бродот Гвадалхивирр, централата и други објекти. Со извршените дела Гемиџиите биле предвесници на големото Илинденско востание.

Имињата на дванаесеттемина борци за слобода за Македонија: Орце Поп Јорданов, Констадин Кирков, Илија Трчков, Димитар Мечев, Владимир Пингов, Тодор и Ѓорѓи Богданови, Тодор Органџиев, Милан Арсов сите од Велес, Павле Шатев од Кратово и Марко Бошњаков од Охрид се патоказ во борбата за зачувување на сомостојноста и независноста на Македонија. Изведувајќи ги атентатите во Солун, Гемиџиите не дозволиле, во објектите што ги дигнале во воздух, да има ниту една друга жртва, освен нив самите кој се заколнале дека по извршеното дело ќе го дадат својот живот за Македонија.

Вчера и на гробот на најмладиот гемиџија Милан Арсов и на спомен гробот на војводата Јован Наумов Алабаков, во велешкото село Ораовец, беше положено цвеќе и беа запалени свеќи.