Тестовите решени, не чекаат испити
Избраниците на Темелковски и против С. Арабија и Ц. Гора покажаа завидна борбеност, желба и добра форма, но потребна е поголема сериозност и подобрување на формата.

Македонија по турнирот во Винтертур во Швајцарија, имаше успешно претставување и на домашна сцена, во дуелите против Саудиска Арабија и Црна Гора, противници кои ги доби и покажа дека формата на нашите репрезентативци пред настапот на СП на 16 јануари во Хрватска е во нагорна линија. Избраниците на селекторот Илија Темелковски покажаа завидна борбеност, желба и пред се добра форма, што е гаранција дека нашите сериозно се подготвуваат, а уште поважно е што мотивот кај сите е огромен. Темелковски во дуелите со квалитетните противници им даде шанса на сите репрезентативци, ротираше многу играчи, а в среда треба да се одлучи кои четворица од 20-те ќе отпатднат и 16-те ќе патуваат за Вараждин каде Македонија ќе ги игра натпреварите на СП. Таму не чека сериозен предизвик, противници ќе ни бидат репрезентации со светско педигре како што се Германија, светски првак, Полска вицешампион, Русија бара враќање на старата слава, како и африканските претставници Тунис и Алжир. Се на се, голем предизвик, но и мотив повеќе да се мине првиот круг, што е желба на сите репрезентативци.
- Имавме добри и лоши работи. Ќе продолжиме да ги отстрануваме лошите работи и во следните денови уште повеќе да ја подобриме формата. Ќе ни треба многу сериозност, желбата е присутна кај сите и битно е добро да се претставиме - беше коментарот на капитенот на нашата репрезентација Кире Лазаров, кој на двете средби постигна 18 голови, со што ја потврди својата ефикасност.

Селекторот Илија Темелковски вака го прокоментира настапот на неговите избраници:
- Одигравме пет контролни натпревари, како што ќе биде на СП во Хрватска. Формата оди во нагорна линија. Ни беше важно да провериме дали можат Димовски и Стојановиќ да играат и повеќе немам грижа за тоа, рече Темелковки. 

"Нашата форма оди го нагорна линија. Се надевам дека ќе експлодираме на СП во Хрватска. Тоа ни е најважно."
Наумче МОЈСОСКИ, репрезентативец на Македонија



Вилизар ПАВЛОВ