Австриската публика неодамна имаше можност да доживее непосреден и директен допир со македонската музика. На 30 март во една од најпрестижните сали на светот - Златната сала на Музикферајн во Виена, каде што се одржува Новогодишниот концерт на Виенските филхармоничари, пред австриската публика се претстави нашиот светски познат гитарист Влатко Стефановски. Тој настапи заедно со Теодосиј Спасов од Бугарија на кавал и Мирослав Тадиќ од Србија/САД на гитара и во придружба на Нижноавстрискиот Тонкунстлер-оркестар, а под диригентската палка на диригентот од Естонија, Кристијан Жерви.
-Заедно со многубројните посетители на распродадениот концерт, таа вечер можеше одново да се доживее непосредниот, директен допир со македонската музика. Стефановски пак, со својата гитара и својата блескава виртуозност, од една страна, како и со препознатливата певливост и медитативната лирика на македонската фолклорна мелодија и мисла, од друга страна, убедливо наметнувајќи се во солистички манир, слободно и мајсторски импровизирајќи, заедно со останатите исполнители, претставуваше своевиден музички празник, посочува во својот допис нашиот амбасадор на култура во Виена, Елена Мисиркова.

Во својата рецензија за настапот таа потенцира дека со многу сенс за многуслојната палета на музички бои и доживувања на своевидната емотивна и структурална градација на балканската музика, диригентот Жервис направи оптимална креација-производ "во пакет" со тројцата светски музичари од Балканот.

Повикувајќи ги солистите на неколку биса, публиката ја манифестирала и својата воодушевеност со бурен и долготраен аплауз.
Според Мисиркова концертот на Стефановски во рамки на овогодишниот фестивал "Балкан фивер" во Виена доживеа огромен успех.
Македонскиот фолклорен ансамбл "МАЈОВЦИ" од Скопје, пак, на 26 април годинава, по препорака на Мисиркова, ќе настапи на Виенскиот градски фестивал, во центарот на Виена. Република Македонија за првпат ќе биде претставена на овој фестивал кој од 24 до 26 април ќе се одржи по 26 пат.

Проследен со голем публицитет, Фестивалот се одвива на отворено на неколкуте огромни бини пред влезот во палатата "Хофбург" на Михаелерплац и пред Националната библиотека на Јозефсплац, како и пред катедралата на Свети Стефан во строгиот центар на градот Виена, каде "на отворено" ќе настапат и гостуваат околу 500 уметници од речиси сите земји на Европа и од Австрија. Според искуството досега, се очекува Виенскиот градски фестивал и годинава да биде посетен од околу 150.000 вљубеници во музиката и танцот.